Diesel-diewe krioel op plase
2010-09-16
DIESEL-DIEWE pronk alweer in die landelike gebiede, en sommer reg voor die Wellingtonse polisiestasie ook. Die afgelope naweek het diewe talle liters brandstof vanuit ’n vragmotor gesteel wat reg oorkant die polisiestasie geparkeer was. Die drywer het vermoedelik by ’n nabye huis ’n uiltjie gaan knip, toe daar toegang tot sy vrag verkry is. Maar boere loop seker die ergste onder diesel-diewe deur. ’n Woordvoerder van die Klapmuts-polisie, konstabel Naima Vaughan, het gesê dat die diefstal van diesel op ’n gereelde basis plaasvind op plase. “Dieseltenke word oopgedwing of slotte word afgebreek. Ons vermoed dat die diewe snags te voet op plase aankom, die diesel steel, en dan word hulle ’n entjie van die plaas af deur ’n motor opgetel. Hulle verdwyn dan spoorloos.” Vaughan vra dat die publiek die polisie in kennis moet stel indien hulle oor enige inligting beskik oor diesel-diewe, of enige ongerymdhede opmerk. Die landelike patrollie van Klapmuts kan geskakel word by 082-443-9373 en die residensiële patrollie by 082-302-8140.
More
News
|
