Cummings herstel stadig uit puin
2010-09-16
Lise Beyers
BETER later as nooit. Dit is die mening van Wellingtonners met die langverwagte herstelwerk wat begin het by Huis Cummings, meer as twee jaar nadat hierdie historiese koshuis deur ’n verwoestende brand in puin gelê is. Die brand het in Mei 2008 ontstaan, vermoedelik weens ’n kortsluiting van ’n verwarmer in een van die studente se kamers. Weens die baie houtafwerkings het die brand soos ’n veldbrand versprei en net die klipgeraamte van die sandsteen- en granietgebou het bly staan. Sedertdien staan Huis Cummings soos ’n spookhuis in die hartjie van Wellington. Maar verlede week het inwoners, wie se harte baie na aan hierdie gebou lê, opgewonde toegekyk hoe ’n span werkers by die gebou begin werskaf. Tans is bouers besig met fase een van die herstelwerk. Dit beteken slegs dat die buitekantse houtwerk herstel word, dat die dak aangebring word en dat die gebou volkome toegemaak word sodat geen verdere skade binne kan plaasvind nie. Wanneer genoegsame fondse dan beskikbaar is, sal die herstelwerk ten volle wegspring. Huis Cummings is een van die eerste geboue van Hugenote Kollege, en is in die laat 1800’s gebou. Dit is nog altyd beskou as ’n besonderse gebou en van historiese argitektoniese belang. Die werk wat tans daar plaasvind, gee hoop dat die gebou eendag tot sy vorige glorie herstel sal word.
More
News
|
