Hittegolf tref Paarlvallei
2011-01-13
Lise Beyers
Die Bergrivier in die Paarl het verlede week behoorlik na ’n vakansie-oord gelyk, soos wat mense lafenis in die koel waters gesoek het tydens die versengende hittegolf wat die vallei vir vyf dae in ’n wurggreep gehad het.
Tot 46°C is in die vallei aangeteken tydens dié week.
Dit was egter nie alles plesier nie. ’n Jong seun van Klapmuts, Randwill September (8), het Woensdagmiddag in ’n plaasdam naby dié dorp verdrink, toe hy en vriende die hitte ook probeer ontsnap het.
Sy liggaam is later deur polisieduikers uit die water gehaal.
’n Man is ook verlede Woensdagmiddag voor ’n winkel in Lady Greystraat dood, moontlik weens hitte-uitputting. Winkelassistente het hom te hulp gesnel, maar dit was te laat.
Volgens familielede van Benjamin George (25) het hy wel aan hartversaking gely, maar sy toestand is verlede week vererger deur die versengende hitte, toe die kwik by 42 gedraai het.
George se begrafnis vind Saterdag om 09:00 vanaf die huis te Polonaisestraat 63, Groenheuwel, plaas, en daarna by die Pinksterkerk in Simfonielaan.
More
News
|
