Gewilde sportman sterf
2011-02-24
Lise Beyers
’n GEWILDE jongman, veral in die sportkringe van die Paarl, het Maandagoggend tragies gesterf. Die liggaam van Chester Kuiler (29) is dié oggend deur sy ouma, Johanna May, gevind by hul woning in Orleans- laan, waar hy van die dak gehang het met ’n hondeleiband om sy nek. Kuiler het glo vir jare lank aan depressie gelei. Hy was sedert sy skooldae by New Orleans Sekondêr Skool ’n belowende sportman wat uitgeblink het in beide krieket en hokkie. Ná skool het hy voortgegaan om sy passie vir sport uit te leef en het hokkie gespeel vir Paarlklub. Hy was ’n uitmuntende veelsydige krieketspeler vir Drakenstein Edu Krieketklub. Hy het nog Saterdag deelgeneem aan hul wedstryd teen Ceres. Trevor Daly, wat by Drakenstein Edu betrokke is, het gesê dat Kuiler oudergewoonte die dag baie geniet het. “Hy het soos altyd met toewyding gespeel en ná die wedstryd het hy met sy spanlede ’n bietjie uitgespan. “Ons is almal ten gronde oor sy ontydige dood. Hy het geleef vir sport en was altyd uiters toegewyd en ook een van die fiksste mense wat ek geken het. Dit is ’n geweldige verlies vir die plaaslike sport-wêreld.” Kuiler het ook sy merk gelaat by Klein Boishaai, waar hy hulpafrigter was vir hokkie en krieket. “Chester was ’n staatmaker as hulp-afrigter en het baie goed met die kinders oor die weg gekom,” vertel skoolhoof Henk Arangies. Hy word oorleef deur sy ouers, Christina en Leslie Kuiler, broer Grant, en sy vierjarige seuntjie, Chezlie. Sy begrafnis vind Saterdag om 08:30 vanaf die huis by Orleanslaan 67 plaas en om 09:30 by die VGK-Hugenote.
More
News
|
