Grafdiewe betrap
2011-04-07
Lise Beyers
TWEE mans is verlede week op heterdaad betrap terwyl hulle grafte geplunder het. Die Paarl polisie is deur ’n lid van die publiek in kennis gestel dat verdagte persone in die Toringkerk-begraafplaas langs die Bergrivier Boulevard opgelet is. Met die aankoms van kst Willie Pretorius en student-kst Duawen van Neel, het hulle gesien dat die mans besig was om metaal-ornamente vanaf grafte te verwyder. Toe die diewe die polisiebeamptes oplet, het hulle probeer vlug, maar hulle is binne die begraafplaas aangekeer. Op die toneel was daar ’n winkeltrollie wat vol metaal-ornamente was wat vanaf grafte gesteel is. Hierdie metaal sou waarskynlik in kleiner, onherkenbare stukkies opgekap word voordat dit aan skroothandelaars verkoop sou word. Vroeër vanjaar is grafkelders by dieselfde Toringkerk-begraafplaas oopgebreek en selfs die doodkiste is deursoek vir waardevolle goedere. André von Willigh en Marquin Willemse is in verband met die jongste diefstal in hegtenis geneem. * Two men have been apprehended by Paarl police while plundering a cemetery.
More
News
|
