Forum word gestig om skrootdiefstal te takel
2011-06-30
SAKELUI, besigheidseienaars, boere en sommer net die besorgde man op straat, word genooi om by ’n forum aan te sluit om die kommerwekkende plaag van skrootdiefstal aan te pak. ’n Wellingtonse sakeman, Martin van Heerden, het besluit om hierdie probleem, wat die plaaslike sakebedryf derduisende rande per maand uit die sak jaag, aan te spreek. Daar is onlangs berig oor Van Heerden se besigheid, Wellington Spares, wat stelselmatig weggedra word deur skrootdiewe. “Hierdie berig het ’n groot impak gehad op lesers, aangesien baie mense wat ek nie eens ken nie, my gekontak het en my meegedeel het van soortgelyke ervarings en genoem het dat hulle my ten volle ondersteun in die saak,” sê Van Heerden. “Ek het dus besluit om ’n forum te stig om skrootdiefstal aan te spreek. Ek is besig met logistieke reëlings hiervoor en vra dat diegene wat wil help, my so spoedig moontlik kontak.” Alle belangstellendes, boereverenigings, buurtwagte, besigheidsforums/verenigings en individue wat belang sou stel om die stigtingsvergadering by te woon, word gevra om Van Heerden te kontak by martin@vanvehicles.co.za. of 021 864 3204.
More
News
|
