My motor, of jou motor, nee, óns motor
2006-07-27
’n MAN het byna agter tralies beland ná ’n ramparty by Jeff’s Pub in Jan van Riebeeckweg, Paarl, toe hy aangesien is vir ’n motordief.
Tydens die makietie het twee mans besluit om die vieringe te verlaat en die pad na Franschhoek te vat om verder geselskap te gaan soek.
Met hul aankoms in Franschhoek is hulle deur die polisie van die pad afgetrek, en die bestuurder is in hegtenis geneem vir motordiefstal.
Hy het volgehou dat die voertuig sy eie is, maar toe hy in die straatlig die kleur van die motor sien, besef hy dat die kleur aansienlik verskil van sy eie motor s’n.
Dit was toe ’n sirkus van flaters, want voor Jeff’s Pub het twee identiese Mazda 323 motors gestaan - die een maroen en die ander donkerblou.
In die swak lig, en moontlik met die hulp van ’n paar doppe brandewyn, kon hy nie tussen die twee voertuie onderskei nie.
Toe sy sleutel pas, het hy aangeneem dat dit sy motor was.
Later die aand, toe die ander Mazda-eienaar besluit dat dit tyd was om huis toe te gaan en hy sien nie sy motor nie, het hy sy voertuig as gesteel aangemeld.
Die hele deurmekaarspul is opgelos sonder dat iemand agter tralies beland het.
More
News
|
