Wynmanne wérk op wiele
2007-09-27
DIT was ‘n boeredag met ‘n verskil, Saterdag se vierwieltrek in die wingerde van Wellington.
Die “rally” deur die rye is aangebied deur Wamakersvallei wynkelder, met verteenwoordigers van al drie produsentekelders op Wellington wie se kennis van wingerdbou en die wynbedryf getoets is.
Maar, dis nie al nie. Die bestuursvernuf van die manne van Wamakersvallei-, Wellington- en Bovleikelders is ook deeglik op die proef gestel.
Daar was 22 bakkies wat deelgeneem het, met 60 boere en plaasbestuurders.
Vir elke bakkie was daar ‘n vraestel, met ‘n kaart van die roete wat binne vier ure voltooi moes wees.
Die deelnemers moes van plek tot plek ry en vrae beantwoord wat betrekking het op die wingerdblok.
Vrae het onder andere gehandel oor grondvoorbereiding, prieelstelsels en plantwydtes, terroirseleksie, onkruid- en siektebeheer, snoeitegnieke en uitkenning van kultivars.
Daar is ook geproe, want dit was immers lede van wynkelders wat mekaar en die ander man se plaas- en boerderymaniere leer ken het.
Die persele was win gerdblokke op verskillende plase op die roete, wat oor 90km van Wellington tot by Hermon, gestrek het.
Die roete is voor die tyd reeds uitgewerk met ’n GPS en daar was natuurlik ‘n paar modderige speelgate ook.
Op die roete was daar ook twee anderlike “natgate”, waar die dors en honger geles kon word.
Die dag is afgesluit met ‘n laat-middagete, waar daar tegniese terugvoer gegee is, maar ook die belangrike op die tafel was - die gesellige samesyn van die boere van Wellington se drie groot wynkelders.
Wenners van die dag was (eerste) die span met PW Botha en Shaun Swanepoel, (tweede) Jannie Bosman, Martin Malan en Hugo Rust, (derde) Jan Louw du Plessis en Niel du Plessis.
Die Beste Wegtrek-prys aan die span van Danie Malan, Helius le Roux, Willie Laubscher en Koos Malan en die prys vir Bestuursvernuf (nadat die manne sy vierwieltrek skelm na twee-wiel gedraai het), Petrus Bosman van Lelienfontein.
More
News
|
